2024 ముగుస్తోంది. టాలీవుడ్ సినిమా రంగం ఈ ఏడాది ఎన్నో సంచలన విజయాలను అందుకుంది. ముఖ్యంగా ఐకాన్ స్టార్ అల్లు అర్జున్, రెబల్ స్టార్ ప్రభాస్ ఇద్దరూ బాక్సాఫీస్ వద్ద తమ సత్తా చాటారు. ఈ ఇద్దరు హీరోలు కలిపి ఈ ఏడాది దాదాపు రూ. 3000 కోట్లు వసూలు చేసి ఇండస్ట్రీలో మైలురాయిగా నిలిచారు.
జూన్‌లో విడుదలైన “కల్కి 2898 ఎ.డి” ప్రభాస్ నటనతో ప్రపంచవ్యాప్తంగా హల్‌చల్ చేసింది. ఈ సినిమా రూ. 1200 కోట్లకు పైగా వసూళ్లు సాధించి ప్రభాస్ సత్తా ఏ స్థాయిలో ఉందో చాటిచెప్పింది. అదే విధంగా, డిసెంబర్‌లో వచ్చిన “పుష్ప 2” అల్లు అర్జున్ కెరీర్‌లోనే అత్యున్నత విజయంగా నిలిచింది. ఈ చిత్రం ప్రపంచవ్యాప్తంగా రూ. 1600 కోట్లకు పైగా వసూళ్లు సాధించింది. ఈ ఏడాది ప్రారంభంలో ప్రభాస్ చేసిన సంచలనానికి, చివర్లో అల్లు అర్జున్ చేసిన ఘన ముగింపుకు టాలీవుడ్ అభిమానులు, ట్రేడ్ విశ్లేషకులు ఆహ్వానం పలికారు.
ఇద్దరు హీరోల సినిమాలు కలిపి చూసినప్పుడు “కల్కి 2898 ఎ.డి” వసూళ్లు, “పుష్ప 2” వసూళ్లు కలిపి రూ. 2800 కోట్లు సాధించాయి. అదనంగా, 2023 చివరిలో విడుదలైన “సలార్” 2024 సంక్రాంతి వరకు కొనసాగిన వసూళ్లతో ప్రభాస్ స్థాయిని మరింతగా పెంచింది. దీంతో 2024లో ప్రభాస్ వసూళ్లు రూ. 1400 కోట్లకు చేరుకోగా, అల్లు అర్జున్ రూ. 1600 కోట్లతో ముందున్నాడు.
ఇదే సమయంలో బాలీవుడ్‌లో 2023లో కింగ్ ఖాన్ షారుఖ్ మూడు భారీ విజయాలను అందుకున్నారు. “పఠాన్” (రూ. 1100 కోట్లు), “జవాన్” (రూ. 1200 కోట్లు), “డంకీ”(రూ. 400 కోట్లు) కలిపి షారుఖ్ ఒక్కరే రూ. 2700 కోట్లు వసూలు చేశారు. ఇది షారుఖ్ స్టార్‌డమ్‌ను మరోసారి నిరూపించింది.
అయితే టాలీవుడ్ హీరోలు ప్రభాస్, అల్లు అర్జున్ కలిపి 2024లో సాధించిన రూ. 3000 కోట్ల వసూళ్లతో, ఈ ఇద్దరూ బాలీవుడ్ కింగ్‌కి ఏమాత్రం తగ్గకపోయే స్థాయిని చేరుకున్నారు. భవిష్యత్తులో ఈ హీరోల నుంచి మూడేసి సినిమాలు విడుదలైతే ఒక్కొక్కరినుంచి ఏడాదికి రూ. 3000 కోట్లు రాబడినా ఆశ్చర్యపోనక్కర్లేదు. టాలీవుడ్ బాక్సాఫీస్ ప్రభావం దేశవ్యాప్తంగా మరింత విస్తరించే రోజులు దగ్గరలోనే ఉన్నాయి.
