పుష్ప 2 చిత్రం విడుదల సందర్భంగా సంధ్య థియేటర్ వద్ద జరిగిన ఘటన ఇరు తెలుగు రాష్ట్రాలలో తీవ్ర చర్చకు దారితీసింది. ఈ ఘటనలో తొక్కిసలాట జరగడం, పలువురికి గాయాలు అవ్వడం, అల్లు అర్జున్ సహా మరికొందరు అరెస్టు కావడం వంటి పరిణామాలు దేశవ్యాప్తంగా అందరి దృష్టిని ఆకర్షించాయి. కొందరు బెయిల్‌పై విడుదలవగా, మరికొందరు ఇప్పటికీ జైల్లోనే ఉన్నారు. తాజాగా, పోలీసులు ఈ కేసు విషయంలో అల్లు అర్జున్‌ను గంటల కొద్దీ విచారించడం కీలక పరిణామంగా మారింది.
తొక్కిసలాటలో తీవ్రంగా గాయపడిన శ్రీతేజ్ ప్రస్తుతం కిమ్స్ ఆసుపత్రిలో చికిత్స పొందుతున్నాడు. ఆయనను పరామర్శించేందుకు సినీ ప్రముఖులు, రాజకీయ నేతలు ఆసుపత్రికి తరలివచ్చారు. తెలంగాణ ఫిల్మ్‌ డెవలప్‌మెంట్‌ కార్పోరేషన్‌ చైర్మన్‌ దిల్ రాజు శ్రీతేజ్‌ను పరామర్శించి, బాధిత కుటుంబానికి అండగా ఉంటామని హామీ ఇచ్చారు. “అమెరికా పర్యటన కారణంగా ఇంతకాలం బాలుడిని చూడలేకపోయాను. ఇప్పుడే వచ్చి పరామర్శించాను. పరిశ్రమ తరఫున బాధిత కుటుంబాన్ని అన్ని విధాలా ఆదుకుంటాం. రేవతి భర్త భాస్కర్‌కు ఉపాది కల్పించేందుకు సిద్దంగా ఉన్నాం” అని దిల్ రాజు అన్నారు.
ఈ వివాదం తెలుగు సినిమా పరిశ్రమపై ప్రభావం చూపుతుండటంతో, దీని పరిష్కారానికి చర్యలు తీసుకోవాలని దిల్ రాజు పేర్కొన్నారు. “తెలంగాణ ప్రభుత్వంతో చర్చించి, ఈ సమస్యకు త్వరలోనే పరిష్కారం కనుగొంటాను. సినీ పరిశ్రమకు, ప్రభుత్వానికి మధ్య వారధిగా ఉండేందుకు ప్రయత్నిస్తాను” అన్నారు.
దిల్ రాజు ప్రస్తుతం రామ్‌ చరణ్‌ నటించిన గేమ్‌ ఛేంజర్‌ చిత్ర విడుదలపై దృష్టి సారించారు. ఈ చిత్రాన్ని సంక్రాంతి పండుగకు విడుదల చేసేందుకు భారీ ప్రమోషన్లు నిర్వహిస్తున్నారు. తెలంగాణ ముఖ్యమంత్రి రేవంత్ రెడ్డి ప్రభుత్వం ప్రీమియర్ షోలు, ప్రత్యేక షోలకు అనుమతి ఇవ్వదని తేల్చి చెప్పడంతో, గేమ్‌ ఛేంజర్‌ పరిస్థితులు ఎలా ఉండబోతాయో అనేది ఆసక్తికరంగా మారింది.
వైద్యులు శ్రీతేజ్ ఆరోగ్యం మెరుగుపడుతోందని వెల్లడించారు. సినీ పరిశ్రమ, అభిమానుల మద్దతుతో సమస్య త్వరలోనే పరిష్కారం కానుందని దిల్ రాజు నమ్మకం వ్యక్తం చేశారు.ఈ వివాదం మరింత ఉద్రిక్తతకు దారితీయకుండా, త్వరలోనే పరిష్కారం కాగలదని అందరూ ఆశిస్తున్నారు.
