నందమూరి బాలకృష్ణ హీరోగా, బాబీ దర్శకత్వంలో నాగవంశీ నిర్మించిన ‘డాకు మహారాజ్’ సినిమా సంక్రాంతి కానుకగా విడుదలై భారీ విజయాన్ని సాధించింది. ఈ సినిమా వంద కోట్లకు పైగా వసూళ్లు చేసి, ఇప్పటికే పలు ప్రాంతాల్లో బ్రేక్ ఈవెన్ సాధించింది. బాలకృష్ణ కెరీర్‌లో ఇది అతి పెద్ద విజయంగా నిలిచే అవకాశాలు ఉన్నాయి. ఈ మూవీ సక్సస్ తో వరుసగా నాల్గవ విజయాన్ని బాలకృష్ణ తన ఖాతాలో వేసుకున్నారు.
ఈ సినిమాకు దర్శకుడు బాబీ కథనమే ప్రధాన ఆకర్షణగా నిలిచింది. కథ సింపుల్‌గా ఉన్నా, ప్రతీ నిమిషం ఆసక్తిని పెంచే విధంగా సన్నివేశాలను బాబీ తీర్చిదిద్దారు. ప్రతి సన్నివేశం అభిమానులకు హై మూమెంట్‌లను అందించాయి. యాక్షన్ సన్నివేశాలు, మాస్ సాంగ్స్ ప్రేక్షకులను ఆకట్టుకున్నాయి. ముఖ్యంగా “దబిడిదిబిడి” పాటకు ఫ్యాన్స్ నుంచి భారీ స్పందన వచ్చింది. అలాగే సినిమాలోని ఇతర పాటలు కూడా ప్రేక్షకుల హృదయాలను గెలుచుకున్నాయి.
ఇంటర్వెల్ సీన్‌తో పాటు బ్యాక్‌గ్రౌండ్ మ్యూజిక్ సినిమాకు అదనపు ఆకర్షణగా నిలిచాయి. సంగీత దర్శకుడు తమన్ అందించిన సంగీతం, స్కోర్ ప్రేక్షకులకు మంచి అనుభూతిని అందించింది. ముఖ్యంగా యాక్షన్ సన్నివేశాల వెనుక తమన్ అందించిన బ్యాక్‌గ్రౌండ్ స్కోర్ సినిమాకు కొత్త స్థాయి తీసుకొచ్చింది.
నిర్మాత నాగవంశీ సినిమా విడుదలకు ముందు చేసిన ప్రమోషన్లతో అంచనాలను పెంచారు. సినిమా ఈవెంట్లను దేశంలో మాత్రమే కాకుండా అమెరికాలో కూడా నిర్వహించడం ద్వారా ప్రేక్షకుల్లో ఆసక్తిని పెంచారు. ప్రతి ఈవెంట్‌ను ప్రేక్షకుల దృష్టిలో నిలిచేలా ప్లాన్ చేశారు. ఈ కారణంగానే సినిమా ప్రారంభం నుంచే మంచి ఓపెనింగ్స్ సాధించింది.
బాలకృష్ణ తన పాత్రలో పూర్తి న్యాయం చేశారు. యాక్షన్ సన్నివేశాల్లో, డాన్స్ మూమెంట్స్‌లో, అలాగే కామెడీ టైమింగ్ సన్నివేశాల్లో తన ప్రత్యేకతను చూపించి అభిమానులను మెప్పించారు. ముఖ్యంగా డాకు మహారాజ్ లుక్ ఆయనకు ప్రత్యేక ఆకర్షణగా మారింది. సినిమా మొత్తానికి బాలకృష్ణ నటనే ప్రధాన బలం అనిపించింది.
హీరోయిన్లలో ఊర్వశి రౌతేలా మాస్ ప్రేక్షకులను అలరించగా, ప్రగ్యా జైస్వాల్, శ్రద్ధా శ్రీనాథ్ పాత్రలు కుటుంబ ప్రేక్షకులను మెప్పించేలా ఉన్నాయి. వారి పాత్రలు కూడా కథనానికి మరింత బలం చేకూర్చాయి.
మొత్తానికి ‘డాకు మహారాజ్’ సినిమా అన్ని వర్గాల ప్రేక్షకులను మెప్పించింది. బాలకృష్ణ నటన, బాబీ కథనం, తమన్ సంగీతం, నాగవంశీ ప్రమోషన్..ఇలా అన్ని కలిసొచ్చిన ఈ సినిమా బాలకృష్ణ కెరీర్‌లో ఒక ముఖ్యమైన మైలురాయిగా నిలిచింది.
