అనిల్ రావిపూడి తెలుగు చిత్రసీమలో తనకంటూ ప్రత్యేకమైన గుర్తింపు తెచ్చుకున్న దర్శకుడు. ఆయన తన సినీ ప్రయాణాన్ని మొదలు పెట్టినప్పటి నుంచి ఎప్పుడూ హీరో ఇమేజ్‌కి తగ్గట్టుగా కథలను సిద్ధం చేస్తూ, కుటుంబ ప్రేక్షకులను ఆకట్టుకునే విధంగా సినిమాలు తెరకెక్కిస్తున్నారు. కామెడీ ప్రధానంగా, యాక్షన్, ఎమోషన్ మేళవించిన కథలతో వరుస విజయాలను అందుకుంటూ ముందుకు సాగుతున్నారు.
అనిల్ రావిపూడి ఇటీవల వెంకటేష్‌తో చేసిన ‘సంక్రాంతికి వస్తున్నాం’ సినిమా ఘన విజయం సాధించడంతో, ఆయనకు మరింత పేరు వచ్చింది. ఆయన ఇప్పటికే బాలకృష్ణతో ‘భగవంత్ కేసరి’, రవితేజతో ‘రాజా ది గ్రేట్’, మహేష్ బాబుతో ‘సరిలేరు నీకెవ్వరు’ వంటి చిత్రాలు రూపొందించారు. ప్రతిసారీ ఆయా హీరోల ఇమేజ్‌కి సరిపోయే కథను ఎంచుకుని, ఆ పాత్రల్లో వారికి కొత్తదనం తీసుకురావడంలో అనిల్ రావిపూడి మాస్టర్.
ఇప్పుడు అదే ఫార్ములాను మెగాస్టార్ చిరంజీవి కోసం కూడా వాడనున్నట్టు తెలుస్తోంది. చిరంజీవి కెరీర్‌లో ద్విపాత్రాభినయం బాగా గుర్తింపు తెచ్చిపెట్టిన అంశం. గతంలో ఆయన ‘యముడికి మొగుడు’, ‘దొంగ మొగుడు’, ‘రౌడీ అల్లుడు’ వంటి సినిమాల్లో ద్విపాత్రాభినయం చేసి, ప్రేక్షకులను మెప్పించారు. రీ-ఎంట్రీ తర్వాత వచ్చిన ‘ఖైదీ నెంబర్ 150’ చిత్రంలో కూడా డబుల్ రోల్ చేసి మంచి స్పందన తెచ్చుకున్నారు. ఇప్పుడు అనిల్ రావిపూడి దర్శకత్వంలో రూపొందనున్న ఈ సినిమాలోనూ చిరంజీవి ద్విపాత్రాభినయం చేయనున్నారు.
ఈ చిత్రంలో ఒక పాత్ర పూర్తిగా మాస్ అట్రాక్షన్ ఉండగా, మరో పాత్ర పూర్తిగా కామెడీ ట్రాక్ మీద సాగుతుందని తెలుస్తోంది. దీంతో చిరంజీవి అభిమానులకు, ప్రేక్షకులకు సరికొత్త వినోదాన్ని అందించే అవకాశం ఉంది. చిరంజీవి గత కొన్ని చిత్రాలు ఆశించిన స్థాయిలో విజయం సాధించకపోవడంతో, ఈ సినిమా పై మరింత ఆసక్తి నెలకొంది. మెగాస్టార్ సరైన కమర్షియల్ హిట్ కోసం ఎదురుచూస్తున్నారు, అనిల్ రావిపూడి అందుకు తగ్గట్టుగా మసాలా ఎంటర్టైనర్‌తో వచ్చేందుకు రెడీ అవుతున్నారు.
ఈ సినిమా షూటింగ్ మే నెలలో ప్రారంభం కానుంది. ఇప్పటికే చిరంజీవి వశిష్ట దర్శకత్వంలో ‘విశ్వంభర’ అనే భారీ ప్రాజెక్ట్ చేస్తున్నారు. ఇది మే నెలలో విడుదల కానుంది. ఈ సినిమా పూర్తయ్యాక, వెంటనే అనిల్ రావిపూడి సినిమా సెట్స్‌లోకి అడుగుపెట్టనున్నారు. మేకర్స్ సంక్రాంతి 2026కి ఈ సినిమాను విడుదల చేయాలని ప్లాన్ చేస్తున్నారు. చిరంజీవి – అనిల్ రావిపూడి కాంబినేషన్ నుండి వస్తున్న ఈ సినిమా మాస్ మరియు కామెడీ ఎంటర్టైనర్‌గా అలరించనుందని సినీ వర్గాల్లో మంచి బజ్ ఉంది. మరి చిరంజీవి ఈ సినిమాతో తన సూపర్ స్టార్ ఇమేజ్‌ను తిరిగి తెచ్చుకుంటారా అనేది చూడాలి.
