గత కొన్ని ఏళ్లుగా తెలుగు సినిమాలు దేశ సరిహద్దులను దాటి ప్రపంచవ్యాప్తంగా మంచి గుర్తింపు పొందుతున్నాయి. మన హీరోలు ఒక్కొక్కరుగా పెద్ద మార్కెట్లలో తమ సత్తా చాటుతూ, ప్రత్యేకమైన ఫాలోయింగ్‌ను పెంచుకుంటున్నారు. ముఖ్యంగా పాన్ ఇండియా స్థాయిలో తెలుగు స్టార్ల చిత్రాలు మంచి విజయాలు సాధించాయి. కొన్ని సినిమాలు ఊహించని కొత్త దేశాల్లో కూడా విడుదలై అక్కడ మంచి స్పందన తెచ్చుకున్నాయి. ఈ లిస్ట్‌లో జపాన్ ప్రత్యేకంగా చెప్పుకోదగినది.
జపాన్‌లో మన సినిమాలకి దారి చూపిన చిత్రం ‘బాహుబలి’. రాజమౌళి తెరకెక్కించిన ఈ చిత్రం అక్కడ భారీ విజయాన్ని అందుకుంది. ఆ తర్వాత ఆయనే తీసిన ‘ఆర్ఆర్ఆర్’ మరింత ఘన విజయం సాధించింది. ఇండియన్ సినిమాలకు సంబంధించి అక్కడ అన్ని రికార్డులను తిరగరాసింది. అయితే ‘బాహుబలి’ హీరో ప్రభాస్ తర్వాత చేసిన ‘కల్కి 2898 ఏ.డి’ను కూడా జపాన్‌లో విడుదల చేశారు. మంచి ప్రమోషన్ చేసినా కానీ, సినిమా అక్కడ ఆశించిన స్థాయిలో ప్రేక్షకులను ఆకట్టుకోలేకపోయింది. విడుదలైన తర్వాత కూడా ఆ సినిమా గురించి పెద్దగా చర్చలు జరగలేదు.
ఇప్పుడేమో జపాన్ మార్కెట్‌లో తన అదృష్టాన్ని పరీక్షించుకోవడానికి జూనియర్ ఎన్టీఆర్ ముందుకు వస్తున్నాడు. ఆయన నటించిన తాజా చిత్రం ‘దేవర’ అక్కడ మార్చి 28న విడుదల కానుంది. ఈ నేపథ్యంలో చిత్రబృందం ప్రమోషన్లు ప్రారంభించింది. ఇటీవల ఎన్టీఆర్ తన జపాన్ అభిమానులతో వీడియో చాట్ చేసి మాట్లాడాడు. త్వరలోనే ఆయన స్వయంగా అక్కడ వెళ్లి సినిమాను ప్రమోట్ చేయనున్నాడని సమాచారం. ఎన్టీఆర్‌కి ‘ఆర్ఆర్ఆర్’కి ముందే అక్కడ కొంతమంది అభిమానులు ఉన్నప్పటికీ, ఆ సినిమా తర్వాత ఆయన ఫాలోయింగ్ మరింతగా పెరిగింది.
జపాన్ నుంచి కొందరు ఫ్యాన్స్ ఇండియాకు వచ్చి ఎన్టీఆర్‌ని కలవడం చూసిన సందర్భాలు ఉన్నాయి. అయితే ‘కల్కి’ లాంటి భారీ విజువల్ వండర్‌కే అక్కడ పెద్ద స్పందన రాకపోతే, ‘దేవర’ లాంటి మాస్ యాక్షన్ ఎంటర్‌టైనర్‌కు ఎంతమేర ఆదరణ లభిస్తుందనేది సందేహాస్పదమే. తెలుగు ప్రేక్షకుల నుంచి కూడా ఈ సినిమా మిశ్రమ స్పందనను అందుకుంది. అంతటి భవిష్యత్తును అంచనా వేయడం కష్టమే.
జపాన్ మార్కెట్‌లో నిలదొక్కుకోవాలంటే ఎన్టీఆర్‌కి మరింత భారీ స్థాయిలో ప్రతిస్పందన రాబట్టే సినిమా అవసరం. ‘ఆర్ఆర్ఆర్’ ప్రభావంతో ఆయనకు అక్కడ మంచి క్రేజ్ ఉంది. కానీ దీన్ని వాడుకుని ‘దేవర’ను ఎంతవరకు ప్రేక్షకులకు చేరువ చేయగలడనేది చూడాలి. ఒకవేళ ఈ సినిమా అక్కడ విజయాన్ని సాధిస్తే, జపాన్‌లో మన హీరోలకు మరింత మంచి అవకాశాలు రావచ్చు. లేదంటే, తెలుగు సినిమాలకు అక్కడ మార్కెట్‌ను మరింత బలోపేతం చేయడానికి ఇంకొంత సమయం పట్టొచ్చు.
