పవన్ హీరోగా తెరకెక్కుతున్న హరిహర వీరమల్లు సినిమా కోసం అభిమానులు ఎంతగానో ఎదురుచూస్తున్నారు. ఎన్నో రోజులుగా పెండింగ్ పడుతున్న ఈ చిత్రం ప్రచారం ప్రస్తుతం వేగంగా సాగుతుండగా, విడుదల తేదీగా మార్చి 28 ప్రకటించడం కలకలం రేపుతోంది. ఈ తేదీకి పవన్ కళ్యాణ్ సినిమా వస్తుందా? లేదా? అనేది ఇప్పటికీ సందేహంగానే ఉంది.
సినిమా నుంచి తాజాగా పాట ప్రోమో, కొన్ని ప్రచార కంటెంట్ బయటకొస్తున్నాయి. ఈ ప్రచారాన్ని చూస్తుంటే సినిమా నిర్మాణం చివరి దశలో ఉందనిపిస్తోంది. కానీ ఇదే సమయంలో మరో రెండు సినిమాలు, నితిన్ నటిస్తున్న రాబిన్ హుడ్, కుర్ర హీరోల మ్యాడ్ 2 కూడా విడుదలకు సిద్ధమవుతున్నాయి. పవన్ కళ్యాణ్ సినిమా వస్తున్నా కూడా ఈ సినిమాలు వెనక్కి తగ్గకుండా ప్రచారంలో బిజీగా ఉన్నాయి. ఇది కొంతమంది ఆశ్చర్యానికి గురి చేస్తోంది. ఎందుకంటే పవన్ సినిమాకు గట్టి పోటీ వస్తే, అది చిన్న, మధ్య తరహా సినిమాలకు ఇబ్బందిగా మారే అవకాశం ఉంటుంది. కానీ ఇప్పుడు అలా జరగడం లేదు.
ఇక్కడ అసలు ప్రశ్న హరిహర వీరమల్లు నిజంగా అనుకున్న తేదీకి థియేటర్లకు వచ్చేస్తుందా అన్నదే. విశ్వసనీయ సమాచారం ప్రకారం, సినిమా పూర్తికావాలంటే పవన్ కళ్యాణ్ కనీసం అయిదు రోజులు షూటింగ్ చేయాల్సిన అవసరం ఉంది. ఈ నెలాఖరుకే సినిమా విడుదల అవ్వాలంటే ఈ షూటింగ్ వెంటనే పూర్తవ్వాలి. కానీ ఫిబ్రవరి చివరి వారమొచ్చినా, ఇంకా ఆ పనులు పూర్తి కాలేదు. మిగతా సీన్లను పోస్ట్ ప్రొడక్షన్ పూర్తి చేసి రెడీగా ఉంచినా, పవన్ కళ్యాణ్ నటించాల్సిన భాగాన్ని షూట్ చేసి దానిని జోడించడానికి కనీసం పది రోజులు అవసరమవుతాయి. అంటే, మొత్తం ముప్పై రోజులలో కనీసం పది రోజులు ఈ పనులకే వెళ్లిపోతాయి.
ఇదిలా ఉండగా, మరో కీలకమైన విషయం ఏమిటంటే, పవన్ కళ్యాణ్ రాజకీయంగా చాలా బిజీగా ఉండడం. ప్రస్తుతం అసెంబ్లీ బడ్జెట్ సమావేశాలు కొనసాగుతున్నాయి, ఇవి మార్చి 21 వరకు ఉంటాయని సమాచారం. ఈ టైంలో పవన్ కళ్యాణ్ షూటింగ్ కోసం సమయం కేటాయించడం కష్టతరమే. కానీ సినిమా విడుదల ఖచ్చితంగా మార్చి 28కి జరగాలంటే, వారాంతాల్లోనైనా పని చేయాల్సి ఉంటుంది. అంటే శని, ఆదివారాల్లో షూటింగ్ చేసేందుకు అవకాశం ఉంటే, రెండుమూడు వీకెండ్స్ లో పని పూర్తయ్యేలా చూడాలి.
అయితే ఇది అంత సులభమైన పని కాదనే చెప్పాలి. రాజకీయ కమిట్మెంట్స్ ఉన్న కారణంగా పవన్ కళ్యాణ్ షూటింగ్ లో పాల్గొనడానికి సమయం కేటాయిస్తారా? లేదా? అనేది కీలకం. ఆయన ఇప్పటికే ఇతర ప్రాజెక్టుల విషయంలోనూ ఇలాగే ఆలస్యమైన సందర్భాలు ఉన్నాయి. అందుకే హరిహర వీరమల్లు ఈసారి అనుకున్న తేదీకి విడుదల అవుతుందా? అన్న అనుమానం మరింత బలపడుతోంది.
ప్రస్తుతం టీమ్ హడావుడిగా ప్రచారం చేస్తోంది కానీ వాస్తవానికి సినిమా విడుదలకు ఇంకా చాలా పనులు మిగిలే ఉన్నట్లు కనిపిస్తోంది. అందువల్ల మార్చి 28న హరిహర వీరమల్లు థియేటర్లలోకి రాకపోయినా ఆశ్చర్యపడాల్సిన అవసరం లేదు.
