సాయి పల్లవి గ్లామర్ షో చేయకపోయినా, తన సహజమైన నటనతో ప్రేక్షకులను అలరిస్తూ, ప్రత్యేకమైన గుర్తింపు తెచ్చుకుంది. అందుకే ఆమెను అభిమానులు ముద్దుగా లేడీ పవర్ స్టార్ అని పిలుస్తుంటారు. ప్రతి సినిమాలో తన నటనతో ప్రేక్షకులను మెప్పించడమే కాకుండా, కొత్తదనం ఉన్న పాత్రలను ఎంచుకోవడంలో తన ప్రత్యేకతను నిరూపించుకుంది. శేఖర్ కమ్ముల దర్శకత్వంలో తెరకెక్కిన ఫిదా సినిమా ద్వారా తెలుగు ప్రేక్షకులకు పరిచయమైంది. మొదటి సినిమాతోనే ప్రేక్షకుల మనసులు గెలుచుకుని, టాలీవుడ్‌లో తనకంటూ ప్రత్యేకమైన గుర్తింపు తెచ్చుకుంది.
ఫిదా తర్వాత వచ్చిన ప్రతి సినిమాలోనూ తనదైన ముద్ర వేసుకుంటూ, నాటకీయతకు ఆస్కారం ఉన్న పాత్రలను ఎంచుకుంటూ నెమ్మదిగా ఉన్నత స్థాయికి ఎదిగింది. ఆమె ఎన్నుకున్న కథల్లో ఎక్కువగా భావోద్వేగాలకు ప్రాధాన్యత ఉంటాయి. నటనకు పెద్ద పీట వేయడమే కాకుండా, పాత్రలో జీవించి ప్రేక్షకులకు తన పరిధిని నిరూపించుకుంటుంది.
ఇటీవల నాగ చైతన్య హీరోగా నటించిన తండెల్ సినిమా మంచి విజయాన్ని సాధించింది. ఈ సినిమా మంచి మౌత్ టాక్ తెచ్చుకుని, బాక్సాఫీస్ వద్ద భారీ కలెక్షన్లను రాబట్టుతోంది. ఈ సినిమాలో సాయి పల్లవి తన పాత్రకు పూర్తి న్యాయం చేస్తూ, మరింతగా మెప్పించింది. ఆమెకు స్టార్ హీరోల సరసన అవకాశాలు వచ్చినా, కథలో తన పాత్రకు ఎంత ప్రాధాన్యత ఉందో పరిశీలించిన తరువాతే ఓకే చేస్తుంది. తండెల్‌లో ఆమె నటన చూసిన ప్రేక్షకులు, అభిమానులు ఆమెను పొగడ్తల్లో ముంచెత్తుతున్నారు.
సాయి పల్లవి ఇటీవల తండెల్ ప్రమోషన్స్‌లో పాల్గొన్నప్పుడు, తనకు టాలీవుడ్‌లో ఇష్టమైన నటుడు ఎవరో వెల్లడించింది. తన అభిమాన నటుడు మరెవరో కాదు పవన్ కళ్యాణ్ అని చెప్పింది. పవన్ కళ్యాణ్ ఒక పెద్ద స్టార్ అయి కూడా ఎంతో సరళంగా, హుందాగా ఉంటారని, ముఖ్యంగా ఆయన నలుగురికి సహాయం చేసే తత్వం తనకు ఎంతో ఇష్టమని చెప్పింది. పవన్ కళ్యాణ్‌కి తాను పెద్ద అభిమాని అని ఈ సందర్భంగా సాయి పల్లవి వెల్లడించింది.
ప్రస్తుతం తండెల్ సినిమా విజయం‌ను ఆస్వాదిస్తున్న సాయి పల్లవి, తన తర్వాతి తెలుగు సినిమా ఏదీ ప్రకటించలేదు. అయితే, బాలీవుడ్‌లో రణ్‌బీర్ కపూర్‌తో కలిసి నితీష్ తివారీ దర్శకత్వంలో రామాయణం సినిమాను చేస్తోంది. ఈ భారీ ప్రాజెక్ట్‌పై అందరిలోనూ భారీ అంచనాలున్నాయి. అయితే టాలీవుడ్ ప్రేక్షకులు మాత్రం ఆమె నుంచి మరో మంచి తెలుగు సినిమా కోసం ఎదురు చూస్తున్నారు.
