సినీ ఇండస్ట్రీలో నందమూరి బాలయ్య గురించి చెప్పడానికి ప్రత్యేకంగా పరిచయాలు అవసరం లేదు. ఆయనకు ఒక ప్రత్యేక గుర్తింపు ఉంది. ఆయన చెప్పే డైలాగులు, డ్యాన్స్ స్టెప్పులు, నటన – ఇవన్నీ అభిమానులను ఎంతో ఆకట్టుకుంటాయి. ముఖ్యంగా ఫ్యాక్షన్ సినిమాలలో బాలయ్య నటన అభిమానులకు మరింత ఇష్టం పెంచుతుంది. ఆయన చేసిన ఫ్యాక్షన్ సినిమాలు తరచుగా బ్లాక్ బస్టర్ విజయాలు సాధించాయి.
బాలయ్య ఇప్పటివరకు ఒకే రీమేక్ సినిమా కూడా చేయలేదు. పక్క భాషల్లో హిట్ అయిన సినిమాలను మన భాషలో రీమేక్ చేయడం సాధారణమైనప్పటికీ బాలయ్య మాత్రం ఇప్పటివరకు రీమేక్ చిత్రాలకు గ్రీన్ సిగ్నల్ ఇచ్చిందే లేదు. కానీ ఆయన సినిమాలను ఇతర ఇండస్ట్రీలు తీసుకుని రీమేక్ చేసి పెద్ద విజయాలు సాధించాయి. బాలయ్య 17 సినిమాల్లో డ్యూయల్ రోల్‌లో నటించారు. “అధినాయకుడు” సినిమాలో మూడు పాత్రలలో నటించడం కూడా ప్రత్యేకం. 1987లో బాలయ్య ఎనిమిది సినిమాలు ఒకే ఏడాదిలో విడుదల చేసి, భారీ విజయాలు సాధించారు. ఆయన 71 సినిమాలు 100 రోజులు పైగా ఆడాయి. ఇప్పటి వారికి 100 డేస్ గురించి పెద్దగా తెలియకపోవచ్చు కానీ 90 దశకం వాళ్ళకి ఈ సినిమాలు 100 రోజులు ఆడడం అంటే ఆ మూవీ క్రేజ్ ఏ రేంజ్ లో ఉంటుందో బాగా అర్థమవుతుంది.
బాలయ్య 6 ఫిలింఫేర్ అవార్డులు, 3 నంది అవార్డులను కూడా గెలుచుకున్నారు. 50 ఏళ్ల సినీ ప్రయాణం తర్వాత, బాలయ్యను ఇటీవల భారత ప్రభుత్వం పద్మభూషణ్ అవార్డుతో సత్కరించింది. ఈ సందర్భంగా సోషల్ మీడియాలో, “పద్మభూషణ్” అవార్డు ప్రకటించిన కేంద్ర ప్రభుత్వానికి ఆయన ధన్యవాదాలు చెప్పారు.
సినిమాల విషయానికి వస్తే, బాలయ్య ప్రస్తుతం “అఖండ 2” సినిమాతో బిజీగా ఉన్నారు. “డాకు మహారాజ్” సినిమా కూడా బ్లాక్ బస్టర్ హిట్ అయింది. అఖండ 2 పూర్తి చేసి, ఇంకొక సినిమా ప్రాజెక్ట్‌ను ప్రారంభించాలని బాలయ్య చూస్తున్నట్లు తెలుస్తుంది. బాలయ్య సినిమాలపైనే కాకుండా, ఆయన చేసే సామాజిక సేవలు, రాజకీయాల్లో కూడా చేసిన కృషి కూడా ప్రశంసనీయం. 50 ఏళ్లుగా సినీ రంగంలో చేసిన ఆయన సేవలు ఎంతో విలువైనవి.
