అల్లు అర్జున్‌ నటించిన పుష్ప 2 సినిమా బాక్సాఫీస్‌ వద్ద భారీ విజయం సాధించి ఇప్పుడు ఓటీటీ లో కూడా అదే రేంజ్‌లో దూసుకుపోతోంది. ప్రపంచవ్యాప్తంగా సినీ అభిమానులను ఆకట్టుకుంటూ నెట్‌ఫ్లిక్స్‌లో జనవరి 30 నుండి స్ట్రీమింగ్‌ అవుతోంది. ఈ సినిమా విడుదలైన కాసేపటికే విపరీతమైన వ్యూస్‌ రాబట్టి ట్రెండింగ్‌లో నిలిచింది.
పుష్పరాజ్‌ పాత్రలో అల్లు అర్జున్‌ అద్భుతమైన నటనను ప్రదర్శించగా, సినిమా విజయం బన్నీ క్రేజ్‌ను మరింత పెంచింది. ఇప్పటికే రూ. 1850 కోట్లకు పైగా వసూళ్లు సాధించిన ఈ చిత్రం ఓటీటీలోనూ సంచలన రికార్డ్స్ నమోదు చేస్తోంది. ఈ సినిమా ప్రపంచవ్యాప్తంగా 21 దేశాల్లో టాప్ 10లో నిలిచింది. అమెరికా, జపాన్, ఆస్ట్రేలియా, పాకిస్థాన్, శ్రీలంక, బంగ్లాదేశ్, దుబాయ్‌ లాంటి దేశాల్లో సినిమా అత్యధికంగా వీక్షించబడుతోంది. “పుష్ప అంటే నేషనల్ అనుకున్నారా? ఇంటర్నేషనల్!” అనే డైలాగ్ నిజమైనట్లు అనిపిస్తోంది.
సినిమాలోని కొన్ని సన్నివేశాలు సోషల్ మీడియాలో వైరల్‌ అవుతున్నాయి. ముఖ్యంగా, అల్లు అర్జున్‌ చీరకట్టుకుని చేసిన ‘జాతర’ డాన్స్‌ సీక్వెన్స్‌ ప్రేక్షకులను మంత్ర ముగ్ధులను చేస్తోంది. అంతే కాదు, క్లైమాక్స్‌లో భారీ యాక్షన్‌ సీక్వెన్స్‌లో బన్నీ అద్భుతమైన స్టంట్స్‌ చేశాడు. ఈ సీన్స్‌ చూస్తుంటే గూస్‌బంప్స్‌ వస్తున్నాయని ప్రేక్షకులు కామెంట్స్‌ చేస్తున్నారు. హాలీవుడ్‌ స్థాయికి మించిన యాక్షన్‌ సన్నివేశాలు ఇందులో ఉన్నాయని, అవెంజర్స్‌ లాంటి సినిమాల కంటే దీనిలోని ఫైట్స్‌ గొప్పగా ఉన్నాయని అంటున్నారు.
ముఖ్యంగా హాలీవుడ్‌ ప్రేక్షకులు కూడా పుష్ప 2 గురించి మాట్లాడుకోవడం విశేషం. అమెరికన్‌ రివ్యూవర్లు కూడా ఈ సినిమా స్థాయిని ప్రశంసిస్తున్నారు. మార్వెల్‌ లాంటి హై బడ్జెట్‌ సినిమాల్లో కూడా ఇంత క్రియేటివిటీ లేదని, పుష్ప 2 మాత్రం ప్రేక్షకులను ఆకట్టుకునేలా ఉందని అంటున్నారు. కొందరు అయితే, అల్లు అర్జున్‌ చేసిన యాక్షన్‌ ఎపిసోడ్‌ అంతా గ్రాఫిక్స్‌ అనుకుంటే, నిజంగా అలా తీయడం హాలీవుడ్‌కే సాధ్యం కాదని చెబుతున్నారు.
అయితే, సినిమా ఎంట్రీలో బన్నీ జపాన్ వెళ్లినప్పుడు ఎత్తుకు ఎగిరే సీన్‌ కొందరికి నమ్మశక్యంగా అనిపించలేదు. కుంగ్‌ ఫూ సినిమాల్లో ఉండే వాతావరణం గుర్తుకొచ్చిందని కొందరు అంటున్నారు. అయినా, సినిమా మొత్తం పాజిటివ్‌ టాక్‌ తెచ్చుకోవడంతో టాలీవుడ్‌ పేరు ప్రపంచవ్యాప్తంగా మారుమ్రోగుతోంది.ఇలా పుష్ప 2 సినిమా ప్రపంచవ్యాప్తంగా రికార్డ్స్ సృష్టిస్తూ, అల్లు అర్జున్‌ క్రేజ్‌ను మరో స్థాయికి తీసుకెళ్లింది. భారీ విజయం సాధించిన ఈ సినిమా మరోసారి తెలుగు సినిమా స్థాయిని పెంచిందని చెప్పుకోవచ్చు.
