టాలీవుడ్‌లో మరోసారి ఐటీ దాడులు కలకలం రేపుతున్నాయి. సినీ ఇండస్ట్రీకి చెందిన ప్రముఖుల ఇళ్లపై ఐటీ శాఖ అధికారులు దాడులు చేయడం కొత్త విషయం కాకపోయినా, ఇటీవల వరుసగా జరుగుతున్న ఈ తనిఖీలు అందరిలో చర్చకు కారణమవుతున్నాయి. తాజాగా ప్రముఖ నిర్మాత దిల్ రాజు ఇంట్లో ఐటీ సోదాలు జరుగుతుండటం టాలీవుడ్‌లో అందరినీ ఆశ్చర్యపరిచింది.
మంగళవారం తెల్లవారుజాము నుంచి హైదరాబాద్‌లోని దిల్ రాజు నివాసం, ఆఫీస్, కుటుంబసభ్యుల ఇళ్లలో ఐటీ అధికారులు తనిఖీలు చేపట్టారు. ఈ తనిఖీలు బంజారాహిల్స్, జూబ్లీహిల్స్, కొండాపూర్, గచ్చిబౌలిలోని ఎనిమిది చోట్ల జరుగుతున్నట్లు సమాచారం. దిల్ రాజు సోదరుడు శిరీష్, కుమార్తె హన్సితరెడ్డి నివాసాల్లో కూడా ఈ దాడులు కొనసాగుతున్నాయి. మొత్తం 55 బృందాలతో ఈ తనిఖీలు జరగడం టాలీవుడ్‌లో అందరికీ షాక్‌గా మారింది. పలు పత్రాలను ఐటీ అధికారులు పరిశీలిస్తుండటంతో, ఈ దాడుల కారణాలపై అనేక ఊహాగానాలు వినిపిస్తున్నాయి.
దిల్ రాజు ఇటీవల రామ్ చరణ్ హీరోగా గేమ్ ఛేంజర్, వెంకటేష్ హీరోగా సంక్రాంతి రిలీజ్ కోసం సిద్ధమైన సినిమాలు నిర్మించారు. ఈ సినిమాల భారీ బడ్జెట్, కలెక్షన్ల నేపథ్యంతో ఈ తనిఖీలు జరుగుతున్నాయనే వార్తలు వినిపిస్తున్నాయి. డిస్ట్రిబ్యూటర్‌గా కెరీర్ ప్రారంభించిన దిల్ రాజు, దిల్ సినిమాతో నిర్మాతగా మారి, ఇండస్ట్రీలో బడా నిర్మాతగా ఎదిగారు. ఆయనను ఇటీవల తెలంగాణ ప్రభుత్వం టీఎఫ్‌డీసీ చైర్మన్‌గా నియమించడం కూడా చర్చనీయాంశంగా మారింది.
అంతే కాకుండా, మైత్రి మూవీ మేకర్స్ సంస్థలోనూ ఐటీ అధికారులు తనిఖీలు చేపట్టారు. మైత్రి నవీన్, సీఈవో చెర్రీ సహా సంస్థలోని కీలక సభ్యుల నివాసాల్లో దాడులు జరిగాయి. అల్లు అర్జున్ నటించిన పుష్ప-2 ప్రపంచవ్యాప్తంగా భారీ కలెక్షన్లు సాధించడం కూడా ఈ దాడుల కారణమా అనే చర్చ మొదలైంది. మరోవైపు, సింగర్ సునీత భర్త రాము నివాసంపైనా ఐటీ దాడులు జరిగినట్లు వార్తలు వస్తున్నాయి.
ఇది వరుసగా జరుగుతున్న ఐటీ దాడులలో భాగమనే అభిప్రాయాలు వ్యక్తమవుతున్నాయి. గతంలో లావణ్య త్రిపాఠి, అనసూయ, సుమ, రష్మిక మందన్న వంటి ప్రముఖుల ఇళ్లపై కూడా ఐటీ దాడులు జరిగాయి. ఇప్పుడు దిల్ రాజు, మైత్రి మూవీ మేకర్స్ వంటి సంస్థలపై దాడులు జరగడం టాలీవుడ్‌ వర్గాల్లో రాజకీయ కోణంపై అనుమానాలకు తావిస్తోంది.
ఈ ఘటనలతో టాలీవుడ్‌లో ఉత్కంఠ నెలకొంది. ఆకస్మాత్తుగా జరుగుతున్న ఈ దాడులు, సినీ ఇండస్ట్రీపై తలెత్తుతున్న అనుమానాలకు కారణమవుతున్నాయి. సమీక్ష అనంతరం ఈ దాడుల వెనుక ఉన్న అసలు కారణం ఏమిటన్నది స్పష్టమవుతుందని ఆశిద్దాం.
