జనసేన అధినేత, ఆంధ్రప్రదేశ్ ఉప ముఖ్యమంత్రి పవన్ కల్యాణ్ కొంతకాలం రాష్ట్రానికి దూరంగా ఉండనున్నారు. పాలనా వ్యవహారాలతో పాటు పార్టీ కార్యక్రమాల్లో నిరంతరం బిజీగా ఉండే పవన్ కల్యాణ్.. తన ఆరోగ్యంపై ప్రత్యేక దృష్టి పెట్టాలని నిర్ణయించుకున్నారు. ఇందులో భాగంగా కుడి భుజానికి ఆయుర్వేద చికిత్స చేయించుకునేందుకు కేరళకు వెళ్లనున్నట్లు తెలుస్తోంది. దాదాపు ఇరవై రోజుల పాటు అక్కడే ఉండే అవకాశం ఉందని సమాచారం.
ఇటీవల ముంబైలో పవన్ కల్యాణ్ కుడి భుజంలోని రొటేటర్ కఫ్ గాయానికి శస్త్రచికిత్స చేయించుకున్న విషయం తెలిసిందే. ఆ తర్వాత వైద్యులు కొంతకాలం పూర్తిగా విశ్రాంతి తీసుకోవాలని సూచించారు. బహిరంగ కార్యక్రమాలకు దూరంగా ఉండటంతో పాటు అధికారిక విధుల్లోనూ ఎక్కువ ఒత్తిడికి గురికావద్దని చెప్పారు. అయితే రాష్ట్ర పాలనలో తన బాధ్యతలను దృష్టిలో పెట్టుకున్న పవన్ ఎక్కువ రోజులు విశ్రాంతి తీసుకోలేకపోయారు.
శస్త్రచికిత్స జరిగిన కొద్ది రోజులకే మంగళగిరిలోని క్యాంపు కార్యాలయానికి వచ్చి ప్రభుత్వ కార్యక్రమాల్లో పాల్గొన్నారు. శాఖల వారీగా సమీక్షలు నిర్వహించడంతో పాటు జనసేన పార్టీకి సంబంధించిన సమావేశాల్లోనూ పాల్గొన్నారు. ఇలా వరుస కార్యక్రమాలతో బిజీగా ఉండటంతో భుజంపై ఒత్తిడి పెరిగినట్లు తెలుస్తోంది. ఈ సమయంలో వాపు, జ్వరం వంటి సమస్యలు కూడా ఎదురైనట్లు సమాచారం.
దీంతో వైద్యుల సూచన మేరకు భుజం పూర్తిగా కోలుకునేలా ప్రత్యేక చికిత్స తీసుకోవాలని పవన్ నిర్ణయించినట్లు తెలుస్తోంది. కేరళలో ప్రకృతి వైద్యం, ఆయుర్వేద పంచకర్మతో పాటు ఇతర చికిత్సా విధానాలను తీసుకోనున్నారని సమాచారం. సెప్టెంబర్ 10 వరకు ఆయన కేరళలోనే ఉండే అవకాశం ఉందని ప్రచారం జరుగుతోంది.
పవన్ కల్యాణ్ ఇంత సుదీర్ఘకాలం రాష్ట్రానికి దూరంగా ఉండటం ఇదే తొలిసారి కావడంతో అభిమానుల్లో ఆసక్తితో పాటు కొంత ఆందోళన కూడా వ్యక్తమవుతోంది. అయితే పూర్తిస్థాయిలో ఆరోగ్యం మెరుగుపడిన తర్వాతే తిరిగి తన విధుల్లోకి రావాలని వైద్యులు సూచించినట్లు తెలుస్తోంది. కేరళలోని ఆయుర్వేద, ప్రకృతి వైద్య విధానాలకు దేశవ్యాప్తంగా మంచి గుర్తింపు ఉండటంతో అక్కడ చికిత్స పొందాలని ఆయన నిర్ణయించుకున్నట్లు చెబుతున్నారు.
ఇదిలా ఉండగా పవన్ కల్యాణ్ తరచూ జ్వరం, ఇతర అనారోగ్య సమస్యలను ఎదుర్కొంటున్న నేపథ్యంలో ఈ విశ్రాంతి ఆయనకు అవసరమేనన్న అభిప్రాయాలు వ్యక్తమవుతున్నాయి. ఇటీవల కూడా అనారోగ్యం కారణంగా కొన్ని కార్యక్రమాలకు దూరంగా ఉన్నారు. పవన్ కేరళలో ఉన్న సమయంలో ఆయన నిర్వహిస్తున్న శాఖల బాధ్యతలను సీనియర్ మంత్రి నాదెండ్ల మనోహర్ పర్యవేక్షించే అవకాశం ఉందని చర్చ జరుగుతోంది.
మొత్తానికి రాజకీయాలు, పాలన, సినిమాలతో నిరంతరం బిజీగా ఉండే పవన్ కల్యాణ్ ఇప్పుడు తన ఆరోగ్యానికి ప్రాధాన్యత ఇస్తున్నారు. చికిత్స పూర్తిచేసుకుని సంపూర్ణ ఆరోగ్యంతో తిరిగి రావాలని అభిమానులు, జనసేన శ్రేణులు కోరుకుంటున్నారు.