తెలుగు సినిమా బాక్సాఫీస్లో 2026 ఏడాది ఇప్పటివరకు కొన్ని ఆసక్తికరమైన మార్పులకు వేదికగా నిలుస్తోంది. భారీ యాక్షన్, మాస్ ఎలిమెంట్స్ ఉన్న చిత్రాలతో పాటు కుటుంబ సభ్యులంతా కలిసి చూసే సినిమాలు కూడా మంచి ఫలితాలను అందుకుంటున్నాయి. దీంతో ఫ్యామిలీ ఆడియన్స్ను థియేటర్లకు తీసుకురావడంపై నిర్మాతలు, హీరోలు మరోసారి దృష్టి పెట్టే పరిస్థితి కనిపిస్తోంది.
ఈ ఏడాది ప్రేక్షకుల ముందుకు వచ్చిన కొన్ని సినిమాలను గమనిస్తే ఈ ట్రెండ్ అర్థమవుతుంది. చిరంజీవి నటించిన ‘మన శంకర వరప్రసాద్ గారు’, నవీన్ పొలిశెట్టి చిత్రం ‘అనగనగా ఒక రాజు’, ‘మా ఇంటి బంగారం’ వంటి చిత్రాలు విభిన్న నేపథ్యాలతో వచ్చినా కుటుంబ ప్రేక్షకులను ఆకట్టుకునే అంశాలకు ప్రాధాన్యం ఇచ్చాయి. దీనికి తాజాగా ‘ఇరుముడి’ కూడా తోడైంది.
‘ఇరుముడి’లో యాక్షన్, క్రైమ్ అంశాలతో పాటు కుటుంబ అనుబంధానికి కూడా ప్రాధాన్యం దక్కింది. ముఖ్యంగా తండ్రి, కూతురు మధ్య భావోద్వేగాలు కథలో కీలకంగా మారాయి. ఆధ్యాత్మిక నేపథ్యం కూడా సినిమాకు ప్రత్యేకతను తీసుకొచ్చింది. ఈ అంశాల కలయిక వల్ల సినిమా మాస్ ప్రేక్షకులతో పాటు కుటుంబ ప్రేక్షకులకు కూడా చేరువైనట్లు తెలుస్తోంది. చిన్న పట్టణాలు, ఇతర కేంద్రాల్లోనూ సినిమా ప్రదర్శనలు కొనసాగడం ఈ ఆదరణకు సంకేతంగా కనిపిస్తోంది.
అయితే కుటుంబ కథాంశం ఉన్నంత మాత్రాన సినిమా విజయవంతం అవుతుందని చెప్పలేం. ప్రేక్షకులు ఇప్పుడు కథలో తమకు నచ్చే అంశం ఉందా లేదా అన్నదే ప్రధానంగా చూస్తున్నారు. కామెడీ, భావోద్వేగం, వినోదం, కథనం.. వీటిలో కనీసం కొన్ని అంశాలు బలంగా ఉంటేనే సినిమా ఎక్కువ మందిని థియేటర్లకు రప్పించగలుగుతోంది. మంచి టాక్ వచ్చిన చిత్రాలకు మొదటి వారాంతం తర్వాత కూడా ఆదరణ కొనసాగుతున్న పరిస్థితి కనిపిస్తోంది.
మరో ముఖ్యమైన విషయం ఏమిటంటే కుటుంబ ప్రేక్షకులు థియేటర్ వ్యాపారానికి పెద్ద బలంగా నిలుస్తారు. ఒకే కుటుంబం నుంచి ఇద్దరు లేదా ముగ్గురు, నలుగురు కలిసి సినిమా చూసేందుకు వస్తే టికెట్ అమ్మకాలు సహజంగానే పెరుగుతాయి. అందుకే గతంలో కొంత వెనుకబడిన ఫ్యామిలీ జానర్కు ఇప్పుడు నిర్మాతలు మళ్లీ ప్రాధాన్యం ఇస్తున్నారని చెప్పొచ్చు.
ఈ ట్రెండ్కు త్వరలో మరో పరీక్ష ఎదురుకానుంది. వెంకటేష్, త్రివిక్రమ్ కలయికలో రూపొందుతున్న ‘ఆదర్శ కుటుంబం హౌస్ నంబర్ 47’ అక్టోబర్ 2న విడుదలకు సిద్ధమవుతోంది. కుటుంబ నేపథ్యంతో తెరకెక్కుతున్న ఈ చిత్రంపై సహజంగానే అంచనాలు ఉన్నాయి. వెంకటేష్కు ఫ్యామిలీ ఎంటర్టైనర్లలో ఉన్న ప్రత్యేక గుర్తింపు, త్రివిక్రమ్కు కుటుంబ కథలను వినోదాత్మకంగా చెప్పే శైలి ఈ సినిమాకు అదనపు ఆసక్తిని తీసుకొస్తున్నాయి.
ప్రస్తుతం సమీపంలో భారీ సినిమాలు ఉన్నప్పటికీ వాటి కథా నేపథ్యాలు భిన్నంగా ఉన్నాయి. దీంతో ‘ఇరుముడి’ తర్వాత ఫ్యామిలీ ఎంటర్టైనర్గా ‘ఆదర్శ కుటుంబం హౌస్ నంబర్ 47’పై దృష్టి పడుతోంది. అది కూడా ప్రేక్షకుల అంచనాలను అందుకుంటే 2026 తెలుగు బాక్సాఫీస్లో కుటుంబ కథలు మరోసారి తమ సత్తా చాటినట్లే అవుతుంది.