పాన్ ఇండియా సినిమాల మార్కెట్ విస్తరిస్తున్న కొద్దీ భారీ ప్రాజెక్టులపై నిర్మాతల ధైర్యం కూడా పెరుగుతోంది. ముఖ్యంగా కేవీఎన్ ప్రొడక్షన్స్ వరుసగా స్టార్ హీరోలతో సినిమాలు చేస్తూ అందరి దృష్టినీ ఆకర్షిస్తోంది. కన్నడ, తమిళ పరిశ్రమల నుంచి మొదలైన ఈ సంస్థ ఇప్పుడు తెలుగు సినిమాల్లోకి కూడా అడుగుపెట్టి పెద్ద స్థాయిలో ప్రాజెక్టులను రూపొందిస్తోంది.
వెంకట్ కె. నారాయణ నేతృత్వంలోని ఈ నిర్మాణ సంస్థ తక్కువ సమయంలోనే భారీ చిత్రాలను లైన్లో పెట్టడం విశేషంగా మారింది. విజయ్ నటిస్తున్న ‘జన నాయకన్’, యశ్ కథానాయకుడిగా రూపొందుతున్న ‘టాక్సిక్’ వంటి ప్రతిష్టాత్మక చిత్రాలతో సంస్థ పేరు దేశవ్యాప్తంగా వినిపిస్తోంది. యశ్కు ‘కేజీఎఫ్’ సిరీస్ ద్వారా దేశవ్యాప్తంగా వచ్చిన క్రేజ్ను దృష్టిలో పెట్టుకుని ‘టాక్సిక్’పై భారీ అంచనాలు ఉన్నాయి. ఈ సినిమా విడుదల వాయిదా పడినా ఆసక్తి మాత్రం తగ్గలేదు.
విజయ్ నటిస్తున్న ‘జన నాయకన్’ విషయంలోనూ నిర్మాణ సంస్థ భారీ స్థాయిలో అడుగులు వేస్తోంది. ఈ చిత్రం విజయ్ సినిమాల నుంచి రాజకీయాల వైపు వెళ్లే ముందు చేస్తున్న చివరి సినిమా కావడంతో ప్రత్యేకమైన ఆసక్తి నెలకొంది. సర్టిఫికేషన్కు సంబంధించిన సమస్యల కారణంగా విడుదలలో జాప్యం ఏర్పడినప్పటికీ, అవసరమైన ప్రక్రియను కొనసాగిస్తూ నిర్మాతలు ముందుకు వెళ్తున్నారు. పంపిణీదారుల అడ్వాన్సులను తిరిగి ఇచ్చి, అవసరమైతే సినిమాను స్వయంగా విడుదల చేయాలనే నిర్ణయం కూడా సంస్థ ధైర్యాన్ని చూపిస్తోంది.
ఇక తెలుగులో మెగాస్టార్ చిరంజీవి తో చేస్తున్న సినిమా కేవీఎన్ ప్రొడక్షన్స్కు మరో కీలక ప్రాజెక్టుగా మారింది. బాబీ కొల్లి దర్శకత్వంలో రూపొందుతున్న ఈ చిత్రం సంస్థకు తెలుగు పరిశ్రమలో తొలి పెద్ద అడుగు. ఇప్పటికే హైదరాబాద్లో షూటింగ్ జరుగుతోంది. చిరంజీవి, బాబీ కాంబినేషన్కు గతంలో ‘వాల్తేరు వీరయ్య’ ఇచ్చిన విజయాన్ని దృష్టిలో పెట్టుకుని ఈ సినిమాపై కూడా భారీ అంచనాలు ఏర్పడ్డాయి.
ఒకే సమయంలో వివిధ భాషలకు చెందిన అగ్ర హీరోలతో సినిమాలు చేయడం సాధారణ విషయం కాదు. కథ, నటీనటులు, నిర్మాణ స్థాయి, మార్కెట్ పరిధి అన్నింటినీ పరిగణనలోకి తీసుకుని భారీ పెట్టుబడులు అవసరం. అయినప్పటికీ కేవీఎన్ ప్రొడక్షన్స్ మాత్రం వెనక్కి తగ్గకుండా వరుసగా పెద్ద ప్రాజెక్టులను ప్రకటిస్తోంది.
ఇప్పటికే సంస్థ కన్నడ, తమిళ సినిమాలతో పాటు ఇతర భాషల్లోనూ తన పరిధిని విస్తరిస్తోంది. తెలుగులో కూడా మరిన్ని చిత్రాలను నిర్మించే దిశగా అడుగులు వేస్తున్నట్లు తెలుస్తోంది.
విజయ్, యశ్, చిరంజీవి వంటి అగ్ర హీరోలతో సినిమాలు ఒకే బ్యానర్లో ఉండటం సినీ వర్గాల్లో ఆసక్తిని పెంచుతోంది. ఈ ప్రాజెక్టులు ప్రేక్షకుల అంచనాలను అందుకుంటే కేవీఎన్ ప్రొడక్షన్స్ పాన్ ఇండియా స్థాయిలో మరింత బలమైన నిర్మాణ సంస్థగా ఎదిగే అవకాశం ఉంది. మొత్తంగా చూస్తే.. భారీ సినిమాల విషయంలో ఈ సంస్థ ప్రస్తుతం ‘తగ్గేదేలే’ అన్నట్టుగానే ముందుకు సాగుతోంది.