మెగాస్టార్ చిరంజీవి తెలుగు సినీ ఇండస్ట్రీలో నెంబర్ వన్ హీరోగా పేరు సంపాదించుకున్నారు. సినీ నేపథ్యం లేకుండా ఇండస్ట్రీలోకి అడుగు పెట్టి, తానేంటో నిరూపించుకుని, దశాబ్దాల పాటు అగ్రస్థానాన్ని నిలబెట్టుకున్నారు. ఆయనకు పోటీగా సినీ కుటుంబాలకు చెందిన హీరోలు వచ్చినా, తన కష్టంతోనే టాప్ ప్లేస్‌లో నిలిచారు. 30 ఏళ్ల పాటు తెలుగు చిత్రపరిశ్రమలో తన ప్రభావాన్ని చూపగలిగిన చిరంజీవి, తన నటన, డాన్స్, మార్క్ ఫైటింగ్, డైలాగ్ డెలివరీతో అభిమానుల మనసుల్లో చెరగని ముద్ర వేశారు.
ఒకానొక సమయంలో దేశంలోనే అత్యధిక పారితోషికం తీసుకున్న నటుడిగా చిరంజీవి నిలిచారు. అటు వెండితెర మీద, ఇటు అభిమానుల గుండెల్లోనూ తన సామ్రాజ్యాన్ని కొనసాగించగలిగారు. సినీ కెరీర్‌లో ఎన్నో అవార్డులు, రివార్డులు అందుకున్నారు. సినీ రంగంలో తన స్థాయిని ఎప్పటికప్పుడు పెంచుకుంటూ, మెగాస్టార్ అనే పదానికి నిజమైన అర్థం చూపించారు. అయితే సినీ కేరియర్‌లో అత్యున్నత స్థానాన్ని అందుకున్న చిరంజీవి, రాజకీయాల్లోనూ తన అదృష్టాన్ని పరీక్షించుకోవాలని నిర్ణయించుకున్నారు.
2009 ఎన్నికల ముందు ప్రజారాజ్యం పార్టీని స్థాపించి రాజకీయ అరంగేట్రం చేశారు. భారీ అంచనాల మధ్య ఎన్నికల్లో పోటీ చేసినా, అనుకున్నంత విజయాన్ని మాత్రం సాధించలేకపోయారు. తన సొంత నియోజకవర్గం పాలకొల్లులో ఓటమి చవిచూశారు. ఇది ఆయన రాజకీయ జీవితానికి పెద్ద ఎదురుదెబ్బ అని చెప్పాలి. అయితే చిరంజీవి తిరిగి సినిమాల్లోకి వచ్చి మరోసారి తన సత్తా చాటేందుకు సిద్ధమయ్యారు.
ఇప్పుడు మళ్లీ చిరంజీవి పేరు సోషల్ మీడియాలో వైరల్ అవుతోంది. ఇందుకు కారణం ఆయన ఇటీవల దుబాయ్ వేదికగా జరిగిన ఇండియా-పాకిస్థాన్ క్రికెట్ మ్యాచ్‌కు హాజరవడం. దీనికి సంబంధించిన ఫోటోలు, వీడియోలు నెట్టింట వైరల్ అయ్యాయి. ఓ స్పోర్ట్స్ అనలిస్ట్ చిరంజీవి మ్యాచ్‌కు వచ్చారని షేర్ చేసిన పోస్టుకు, ఓ నెటిజన్ “ఎవరితను?” అని కామెంట్ చేశాడు. దీనికి మరో నెటిజన్ “రామ్ చరణ్ తండ్రి” అంటూ సమాధానం ఇచ్చాడు. ఆశ్చర్యకరంగా, ఇంకొకరు “రామ్ చరణ్ ఎవరూ?” అని అడగడం మెగా అభిమానులను తీవ్రంగా కోపానికి గురి చేసింది.
ఈ సంఘటన సోషల్ మీడియాలో చర్చనీయాంశంగా మారింది. చిరంజీవి లాంటి దిగ్గజ నటుడిని గుర్తుపట్టలేకపోవడం అభిమానులకు అసహ్యంగా అనిపించింది. ముఖ్యంగా భారతీయ సినిమా చూసే ప్రతి ఒక్కరికీ చిరంజీవి గురించి తెలుసుండాల్సిందేనని, లేదంటే వారి సినీ పరిజ్ఞానం ప్రశ్నార్థకమని మెగా ఫ్యాన్స్ అంటున్నారు. ప్రస్తుతం ఈ ఘటనకు సంబంధించిన వీడియో విపరీతంగా షేర్ అవుతోంది.
