ప్రభాస్ నటిస్తున్న ‘ది రాజా సాబ్’ సినిమా గురించి రోజుకో వార్త వినిపిస్తోంది. మారుతి దర్శకత్వంలో తెరకెక్కుతున్న ఈ హారర్ కామెడీ చిత్రంపై అభిమానుల్లో భారీ అంచనాలున్నాయి. మొదట ఏప్రిల్ 10న విడుదల కావాల్సిన ఈ సినిమాకు తాజాగా మరోసారి పోస్ట్‌పోనయ్యే అవకాశం ఉన్నట్లు సమాచారం.
సినిమా షూటింగ్ దాదాపుగా పూర్తయిందని మేకర్స్ ప్రకటించినప్పటికీ, ఇంకా కొన్ని కీలక సన్నివేశాల చిత్రీకరణ మిగిలి ఉందట. అలాగే, పోస్ట్ ప్రొడక్షన్ పనులు పూర్తి కాలేదని తెలుస్తోంది. ముఖ్యంగా విజువల్ ఎఫెక్ట్స్ పనిలో జాప్యం జరుగుతున్నట్టు ఇండస్ట్రీ వర్గాలు చెబుతున్నాయి. హారర్ సినిమాల్లో గ్రాఫిక్స్ కీలకమైన పాత్ర పోషిస్తాయి. అందుకే మేకర్స్ ఎక్కడా రాజీ పడకుండా అత్యున్నత ప్రమాణాలతో సినిమాను అందించాలనే లక్ష్యంతో ఉన్నారు.
మారుతి సాధారణంగా తన సినిమాలను వేగంగా పూర్తి చేసే దర్శకుడిగా పేరు పొందాడు. కానీ ప్రభాస్ లాంటి స్టార్ హీరో సినిమా కావడంతో, అతను కూడా చాలా జాగ్రత్తగా సినిమాను తెరకెక్కిస్తున్నాడు. రాజమౌళి, సుకుమార్ లాగా మరింత క్వాలిటీ మీద ఫోకస్ పెట్టాల్సిన పరిస్థితి వచ్చింది. ఈ సినిమా మారుతి కెరీర్‌కు కూడా చాలా కీలకం. కాబట్టి, ఆలస్యం అయినా మంచి కంటెంట్ అందించాలనే ఉద్దేశంతో ముందుకు సాగుతున్నాడు.
తాజా సమాచారం ప్రకారం, ఏప్రిల్ 10కి ప్లాన్ చేసిన విడుదలను మేకర్స్ వాయిదా వేసి, జూలై 18కు మార్చే యోచనలో ఉన్నారని తెలుస్తోంది. అయితే, ఈ తేదీ కూడా ఇంకా అధికారికంగా ఖరారు కాలేదు. గ్రాఫిక్స్ టీమ్ పనిని వేగంగా పూర్తి చేసేందుకు ప్రయత్నిస్తున్నప్పటికీ, మరింత సమయం పట్టే అవకాశం ఉందని టాక్.
ప్రభాస్ సినిమాలన్నీ భారీ స్థాయిలో విడుదలయ్యే ప్రాజెక్ట్స్ అవుతాయి. దీంతో అభిమానుల్లో అంచనాలు రెట్టింపు అవుతాయి. అయితే, గతంలో ‘సలార్,’ ‘కల్కి 2898 ఎడి’ సినిమాలు అనుకున్న సమయానికి విడుదల కాకపోవడం వల్ల అభిమానులు ఈ సినిమా విషయంలోనూ అదే పరిస్థితి తలెత్తుతుందా? అని ఆందోళన చెందుతున్నారు.
ప్రస్తుతం సినిమా షూటింగ్ దాదాపుగా ముగిసినా, ప్రభాస్ పలు కీలక సన్నివేశాల కోసం మరో రెండు వారాల షూటింగ్ చేయాల్సి ఉందట. విజువల్ ఎఫెక్ట్స్ పనిని పూర్తిగా తగిన ప్రమాణాలతో చేయాల్సిన అవసరం ఉంది. అందుకే మేకర్స్ హడావుడిగా రిలీజ్ చేయకుండా, మరింత క్వాలిటీ పెంచేందుకు ఎక్కువ సమయం తీసుకుంటున్నారని సమాచారం. ఈ సినిమా ఒక పెద్ద బడ్జెట్ ప్రాజెక్ట్ కావడంతో, టెక్నికల్ టీమ్ హై స్టాండర్డ్స్ మెయింటైన్ చేయాలని ప్రయత్నిస్తోంది. ప్రస్తుతం మేకర్స్ ఎప్పుడు రిలీజ్ డేట్ పై అధికారిక ప్రకటన చేస్తారో చూడాలి.
