తెలంగాణ కొంగుబంగారం నల్ల బంగారం. మన దేశంలో రైల్వే తర్వాత అత్యధికమంది ఆధారపడిన రంగం ఈ సింగరేణి ఈ బొగ్గు గనులు. దీన్నే కోల్ట్‌బెల్ట్‌ ఏరియా అని కూడా అంటారు.
తెలంగాణలోని కొత్తగూడెం, ఖమ్మం, పెద్దపల్లి, మంచిర్యాల ఆసిఫాబాద్‌, ఇల్లందు, మణుగూరు, రామగుండం, భూపాలపల్లి బెల్లంపల్లి, శ్రీరామ్‌పూర్‌ తదితర ప్రాంతాలో ఈ సింగరేణి బొగ్గు గనులు విస్తారంగా వ్యాపించి ఉన్నాయి.
ఈ సింగరేణి ఎన్నికలు అంటే ఈ ప్రాంతాల్లో అసెంబ్లీ ఎన్నికలకున్నంత హడావుడి ఉంటుంది.
ప్రాణాలకు తెగించి భూగర్భం నుంచి బొగ్గును వెలికితీసే కార్మికులు తమ సంక్షేమం కోసం పాటుపడే వారిని ఎన్నికల్లో గెలిపించుకోవటానికి శాయశక్తులా కృషి చేస్తారు.
తాజాగా బుధవారం సింగరేణి కార్మిక గుర్తింపు సంఘం కోసం ఎన్నికలు జరిగాయి. ఈ ఎన్నికల్లో సీపీఎం అనుబంధ సంస్థ అయిన ఏఐటీయూసీ (సింగరేణి కాలరీస్‌ వర్కర్స్‌ యూనియన్‌) గుర్తింపు సంఘంగా ఘనవిజయం సాధించింది.
అలాగే రెండవ స్థానంలో నిలిచే సంఘాన్ని ప్రాతనిధ్య సంఘం అంటారు. ఈ ప్రాతనిధ్య సంఘంగా కాంగ్రెస్‌ పార్టీ అనుబంధ విభాగం ఐఎన్‌టీయూసీ (సింగరేణి కోల్‌మైన్స్‌ లేబర్‌ యూనియన్‌) నిలిచింది.
అయితే టీఆర్‌ఎస్‌ అధికారంలో ఉన్న సమయంలో రెండు పర్యాయాలు గుర్తింపు సంఘంగా ఉన్న తెలంగాణ బొగ్గుగని కార్మిక సంఘం (టీబీజీకేఎస్‌) ఈ తాజా ఎన్నికల్లో అడ్రస్‌లేకుండా పోయింది.
ఎన్నికలకు ముందే ఈ సంఘానికి చెందిన కీలక నాయకులు, పెద్ద సంఖ్యలో కార్మికులు కాంగ్రెస్‌ జెండాలు కప్పుకున్నారు. దీంతో కవిత ఆధ్వర్యంలో 9 ఏళ్లుగా హల్‌ చల్‌చేసిన సంఘం కాస్తా చిన్నభిన్నమై కనీసం పోటీ చేయటానికి కూడా ముందుకు రాని పరిస్థితి.
దీంతో అధికారం పోయిన అతి స్వల్ప కాలంలోనే కేసీఆర్‌కు ఈ ఓటమి మింగుడు పడటం లేదు. సింగరేణిలో మొత్తం ఓటర్లు 39,773 మంది ఉండగా, 37,468 ఓట్లు పోలయ్యాయి. మొత్తం 13 కార్మిక సంఘాలు ఈ ఎన్నికల బరిలో నిలిచాయి.
ఇందులో 5 జాతయ కార్మిక సంఘాలు కూడా ఉండటం విశేషం. కేంద్ర ప్రభుత్వం ఆధ్వర్యంలో నడిచే ఈ సంస్థ ఎన్నికల్లో మొత్తానికి కార్మికులు కేసీఆర్‌కు అసలు రాజకీయం అంటే ఏమిటో చూపించారనే సెటైర్స్‌ వినిపిస్తున్నాయి.